Denne veka var det duka for Utdanningsmessa, ei årleg messe på Vikahaugane arrangert av Rotary der ungdomsskule- og vidaregåandeelevar i regionen får møte utdanningsinstitusjonar og bedrifter. Bømlo Næringsråd tok turen innom på onsdag og fekk oppleve ein arena full av aktivitet. Det var tydeleg at elevane frå ungdomsskular og vidaregåande skular i regionen var nysjerrige på utdanningsmoglegheitar, karrierevegar og dei ulike bedriftene.

Bedriftene frå Bømlo stod samla i det som vert kalla for Bømlogata, som er fasilitert av Bømlo Opplæringskontor. Med seg hadde dei Bømlo vidaregåande skule, samt 14 bedrifter som presenterte arbeidsmoglegheiter og framtidsutsikter. Det er inspirerande å sjå korleis desse bedriftene, år etter år, brukar messa til å knyte kontakt med framtidige arbeidstakarar og vise fram kva dei har å tilby. Me er utruleg imponerte over både engasjementet til bedriftene og kor interesserte elevane er.

Utdanningsmessa har vore ein viktig arena for samhandling mellom skule og arbeidsliv i ei årrekkje. Gjennom Bømlogata blir elevane kjende med moglegheitene som finst på heimstaden, medan bedriftene får sjansen til å kome i dialog med neste generasjon arbeidstakarar. Dette er ei investering i framtida og eit viktig bidrag til utviklinga av lokalsamfunnet.

Me ser fram til neste års messe og til å følgje utviklinga vidare!