Velkomstpakkar for tilflyttarar var eit av forslaga som kom opp under arbeidet med Tilflyttarstrategien. No har Bømlo kommune fått tilskot på 213.000 kroner frå Vestland fylkeskommune for å utvikla velkomstpakkar til tilflyttarar. Dette skjer som ein del av fylkeskommunen si støtteordning for berekraftig samfunnsutvikling.

Målet med velkomstpakkane er å gje nye innbyggjarar ei kjensle av å vera velkomne, samt hjelpa dei med å etablera eit sosialt nettverk i sin nye heimkommune. Dette gjeld både tilflyttarar frå andre delar av landet, frå utlandet, eller berre frå nabokommunar.

Velkomstpakkane er eit tiltak som skjer i samarbeid med grendautvala, lag og organisasjonar, kommunen og næringslivet på Bømlo. Kommunen treng å betra mottaket av tilflyttarar, og målet med velkomstpakkane er å utvikla ein felles kultur og rutinar for korleis tilflyttarar vert tekne imot. Dette omfattar alt frå kven som seier velkomen, til kva informasjon som er viktig å dela, samt korleis brosjyrar og materiell kan utformast.

Velkomstpakkane er eit av fleire tiltak som vart foreslått under arbeidet med tilflyttarstrategien, og dei skal vera eit bidrag til å skapa eit meir inkluderande samfunn i Bømlo. No startar arbeidet med å lage klar velkomstpakkane, og me håpar at næringslivet er behjelpelege med å bidra når det vert aktuelt.