Torsdag var fylkesvaraordførar Stian Jean Opedal Davies (AP), stortingsrepresentant Linda Monsen Merkesdal (AP) og stortingsrepresentant Benjamin Jakobsen (AP) på besøk på Bømlo. Besøket hadde som mål å sjå nærare på utdannings- og næringslivet på Bømlo, samt diskutere aktuelle utfordringar og moglegheiter for utvikling.

Politikarane starta dagen saman med Bømlo vgs og LOS Marine, før Bømlo Næringsråd fekk gleda av å ta dei med til Bømlo Fiskerihamn for å vise fram eit næringsområde i sterk vekst. 

Første stopp på Bømlo Fiskerihamn var Hardanger Seafood, der dei blei møtt av dagleg leiar Einar Eide. Her vart det framheva behovet for meir sesongtilpassa MTB (maksimal tillaten biomasse) for å sikre jamn tilgong på fisk gjennom året. Dette er noko som næringsrådet har løfta fram ved fleire anledningar tidlegare. Rekruttering var og eit tema, og Eide informerte om at selskapet har ein internasjonal arbeidsstokk, der heile 2/3 er utanlandske arbeidarar. Dei har eit hypermoderne slakteri, der dei med 30 arbeidarar per skift produserer 200 tonn sløyd laks på 8,5 timar dagleg, noko som ilsvarar 11 vogntog.

Politikarane fekk så ein tur innom Bømlo Skipsservice, der dagleg leiar Sveinung Vestbø fortalde om ei bedrift i rask vekst. Omsetninga har auka med 120 millionar kroner berre i 2024. Delegasjonen var mektig imponert over denne utviklinga, og ikkje minst då dei fekk sjå Europas største skipskran, samt gå ein tur ut på Norges største molo.

Gjennom dagen fekk dei politiske representantane eit grundig innblikk i korleis utdanning og næringsliv samarbeider på Bømlo, samtidig som dei fekk høyre om utfordringar som kan påverke vidare utvikling. Tett dialog mellom politikarar, skular og næringslivet er avgjerande for å sikre framtidig vekst og innovasjon i regionen. 

Bømlo Næringsråd takkar for at de ville møte næringslivet på Bømlo!