Høyringssvar frå byggjenæringa, kommuneplanen sin arealdel (KPA)
Bømlo Næringsråd har saman med medlemsbedrifter innan byggjenæringa gjennomgått KPA-en som ligg ute til høyring. Det er mykje godt arbeid som er gjort i planforslaget, og me registrerer at mange av innspela byggjenæringa har kome med tidlegare har blitt teke omsyn til i arbeidet. I planen som no er på høyring, ser me samstundes at det er formuleringar og innhald som bør justerast eller endrast. Innspela me har gjeve til KPA-en i høyringssvaret vårt, kan lesast her.
KPA-en som ligg ute til høyring, og som me referer til i høyringssvaret vårt, kan lesast her.
Byggjefelt og naustområde
I arbeidet med rullering av KPA-en, har det vore nokre silingskriteria, der det mellom anna er sagt nei til nye naustområde. I tillegg legg KPA ikkje opp til nye bustadfelt, utanom eitt lite areal på Leite. Dette meiner me er uheldig, då erfaringstal viser at her i kommunen, vert det bygd flest bustader i byggjefelt som byggjenæringa utviklar.
I sentrumsområda er tomteprisane høgre enn utanfor. Å berre legge til rette for bygging av mindre bustader i sentrumskjernar, vil ikkje vere berekraftig med omsyn til økonomi for fleire av målgruppene som treng mindre bustader. Dette kjem me attende til i høyringssvaret vårt til kapittel 3.1.1.
Det er mykje godkjent byggjeland på Bømlo, men det burde vore gjennomført ei kritisk vurdering på om byggjefelta som ligg inne er dei rette, i høve tilgang på veg, vatn, straum. Det er dyrt å etablere tekniske anlegg, slik at realismen i byggjefelt som ikkje har dette i nærleiken, er låg. Av same grunn bør ikkje tomter som er planert, og der tekniske anlegg meir eller mindre ligg klart, fjernast frå planen, eller leggjast utanføre byggjegrense til sjø.
Byggjenæringa i Bømlo peiker på at nye byggjefelt viser seg å vere attraktive, særleg for bømlingar som vurderer å flytte heim. Bustadområde med tilgang til naust gjer Bømlo attraktivt òg for folk utan tilknyting til staden. Vidare er nye byggjefelt positive for omsetninga av eldre bustader i nærleiken av nye felt. Dette er viktig med tanke på ambisjonar om at eldre kan selje einebustadane sine, til ein pris som gjer at dei kan ha råd til sentrumsnære leilegheiter. Samstundes gjer det til dømes unge barnefamiliar som ikkje har råd til (eller vil) byggje nytt, rimelegare einebustader enn kva eit nybygg kostar. Gjennom godt planlagt og strukturert til rettelegging av nye byggjefelt i KPA-en rundt lokalog kommunesenter, kan ein legge til rette for at unge overtek einebustader frå eldre, og eldre flyttar inn i einingar der det betre kan leggjast til rette for hjelpemiddel, effektive heimetenester mv. dersom slike behov skulle melde seg etter kvart.
Me ber om at Bømlo kommune set seg til mål å legge til rette for fleire nye naustområde og byggjefelt i og rundt lokal- og kommunesenter, der infrastruktur er lett tilgjengeleg, då dei positive synergieffektane av dette for kommunen kan vere store.
LNF spreidd og teljepraksis
I tillegg til utbygging av byggjefelt, vert det kvart år bygd ein god del hus i eksisterande bustadområde og i LNF-spreidd over heile øya. Større delar av inntekta til byggjefirma på Bømlo, kjem frå nettopp byggjeprosjekt i LNF-spreidd. Det er viktig for næringa at det framover òg er lov å byggje i LNF-spreidd, og fleire av innspela me kjem med i høyringssvaret er for å legge til rette for at område merka LNF-spreidd vert realistiske område å byggje i - alt frå innspel om byggjegrenser til sjø, avstand til veg, arealutnytting og bustadtypar.
I tillegg peikar me på at arealplanen bør ha ei tydeleg definering av teljepraksis, som sikrar at det vert opna opp for å starte teljing på ny kvart 4. år i LNF-spreidd/eksisterande bustadområde, dersom KPA-en ikkje vert rullert på ny innan fire år er gått.
Ryddigare byggjegrense til sjø
I planforslaget opplever næringa byggjegrensa til sjø som uryddig. Den sirklar stort sett rundt eksisterande bustader i felt, slik at det fort er 2 – 3 byggjegrenser kring eksisterande bygg. Dette gjer at målet med å få opp ei byggjegrense til sjø, som til dømes at det er rom å føre opp eit hus til på heimegarden i LNF-spreidd, ikkje vert mogleg å realisere i praksis.
For naustområde, risikerer fleire med nausttomter der dei ikkje har ført opp naust, at dei må i gang med reguleringsplan for sitt naust dersom KPA vert godkjent slik den ligg i høyringsforslaget. Gjerne er området tett på utbygd, med berre ein eller to ubygde tomter att. Dette vil gje eit stort meirarbeid og ein ekstrakostnad som ikkje vil gje noko ekstra verdi for nokon i dei tilfella dette gjeld.
Me ber om at byggjegrense til sjø vert ei samanhengande linje, og ikkje vere avgrensa til eksisterande felt/bustadområde/LNF-spreidd. I eksisterande og nye naustområde bør byggjegrense til sjø leggjast til 3 m ut frå kystkonturen.
Overstyring av eldre reguleringsplanar
KPA-en burde overstyrt eldre reguleringsplanar der felt er ferdig, eller tett på ferdig, utbygd. Særleg eldre planar med mindre enn 35 % BYA burde fått moglegheit til maksimal utnytting til 35 %-BYA per tomt. Det same gjeld gamle sentrumsplanar, der det er krav om 25 %-BYA per tomt. For eine- og tomannsbustader er utnytting maksimalt 35 %-BYA per tomt.
Innspel til føresegnene
Bømlo Næringsråd og medlemsbedrifter innan byggjenæringa ønskjer ein kommuneplan som er god for kommune, utbyggjarar og private, slik at ein reduserer bruk av dispensasjonar, og der igjen vonleg kostnader i arbeidet med bustadutvikling framover. Under følgjer våre innspel til føresegnene, som me meiner vil gjere KPA-en til eit enno betre verktøy for å utvikle kommunen framover.
2.2.1 Rekkefølgjekrav (pbl. § 11-9, nr.4) 1. Reguleringsplanar skal sikre gjennomføring av teknisk anlegg før det vert gjeve igangsetjingsløyve til tiltak, og at nødvendig infrastruktur vert ferdigstilt i ønska rekkefølgje og med rett kvalitet. Innspel frå næringsrådet: Slik det står no, må alt av teknisk anlegg vere ferdigstilt før ein kan starte å byggje hus. Her vil det vere fornuftig å byte ut «igangsettingsløyve» med «ferdigattest». |
2.3.1 Felles føresegner for byggjegrenser (pbl. § 11-9 nr.5, jf. pbl. § 1-8) 1. Nye bygningar og tilbygg skal byggjast innanfor byggjegrense der denne er vist i kommuneplankartet eller i reguleringsplan. Denne byggjegrensa gjeld også for utstikkande bygningsdelar, og overbygg, om ikkje anna er definert i reguleringsplan. Innspel frå næringsrådet: I plan og bygningslova er det rom for å ha t.d. takutstikk over byggjegrensa eller utkraga balkong. I føresegnene til KPA-en til Bømlo kommune er det no avgrensa til å vere innafor bygningsgrensa. Me føreslår at ein held seg til plan- og bygningslova der ikkje anna er regulert, og då følgjande omskriving av føresegna: 1. Nye bygningar og tilbygg skal byggjast innafor byggjegrense i tråd med plan- og bygningslova, viss ikkje anna er definert i reguleringsplanen. Denne byggjegrensa gjeld også for utstikkande bygningsdelar, og overbygg, om ikkje anna er definert i reguleringsplan. |
2.3.2 Byggjegrenser til sjø (pbl. § 11-9 nr.5, jf. pbl. § 1-8) 1. Byggjegrense mot sjø i plankartet til kommuneplanen sin arealdel eller gjeldande reguleringsplanar, gjeld framfor byggeforbodet i 100-metersbeltet mot sjø, jf. pbl. § 1-8. Innspel frå næringsrådet: Slik føresegna er skrive no, kan dette tolkast som ei avgrensing for framtidige reguleringsplanar. Foreslår difor følgjande omskriving, for å vere trygg på at dette ikkje vert eit hinder framover. 1. Byggjegrense mot sjø i plankartet til kommuneplanen sin arealdel eller gjeldande og framtidige reguleringsplanar, gjeld framfor byggeforbodet i 100-metersbeltet mot sjø, jf. pbl. § 1-8. |
2.3.2 Byggjegrenser til sjø (pbl. § 11-9 nr.5, jf. pbl. § 1-8) 2. Dersom strandsoneomsyna er ivareteke kan aktuelle unntak frå § 2.3.2.1 og pbl. § 1-8, vera:
Innspel frå næringsrådet: I høve punktet om utfylling i sjø og etablering av kai, inntil 3 meter utanfor byggjegrensa, dersom byggjegrensa i kommuneplankartet er lagt i kystkonturen og arealføremålet går lengre ut i sjø enn byggjegrensa. Slik me les dette, betyr det at naust/ fritidsbustader i 25-metersbeltet maks kan vere 3 meter ut frå kystkonturen. Det er derimot ikkje alltid det er fornuftig å utvikle ei tomt slik. Her følgjer to dømer: 1) Det kan vere tilfelle der det er veldig bratt terreng, og då vil det vere meir hensiktsmessig å fylle ut lenger enn 3 meter, for å sleppe ei enorm skjering i bakkant av tomta. 2) Der det er langgrunt burde det vere mogeleg å fylle ut, slik at ein får minimum 1,5 meter djupne ved fjære sjø. For å unngå dispensasjonssøknader i saker der andre avstandar vert søkt om, for å hindre til dømes større naturinngrep, tilrår me at kommunen legg inn ein setning om at «Kommunen kan godkjenne andre byggegrenser der dette er fornuftig i høve terreng.». |
2.3.4 Byggjegrense mot veg, VA-anlegg høgspent (pbl. § 11-9 nr.5) 2. Byggjegrensa langs kommunevegar er 20 meter om ikkje anna er fastsett i reguleringsplan, kommunal vegnorm eller om kommunestyret i enkeltvedtak fastset ei mindre byggjegrense. Innspel frå næringsrådet: Slik som føresegna står no er kravet uklårt, då det ikkje er presisert om kravet frå asfaltkant eller regulert kant. I reguleringsplanar er det normalt å regulere byggjegrenser 5 meter frå asfaltkant, uavhengig om det er fortau eller ikkje, og garasje 2 meter frå asfaltkant. Me foreslår difor ei formulering om 7 meter frå senterlinja, og at «kommunal vegnorm» vert sletta. 2. Byggjegrensa langs kommunevegar er 7 meter frå senterlinja om ikkje anna er fastsett i reguleringsplan, kommunal vegnorm eller om kommunestyret i enkeltvedtak fastset ei mindre byggjegrense. |
2.4.1 Senterstruktur og lokalisering av handel og besøksintensive verksemder (pbl. § 11-9 nr. 5) 3. Bustadar innanfor sentrumskjernen for kommunesenteret Svortland (#5_1) skal vera konsentrert småhusbygg eller bustadblokker. Unntak er eine-/tomannsbustad i godkjend reguleringsplan. Innspel frå næringsrådet: Det er uklårt kva som ligg i begrepet «konsentrert småhusbygg», og det er ikkje noko i TEK17 som har denne benemninga. Det som er definert i TEK17 er småhus, og der er definisjonen «enebolig, to- til firemannsbolig, rekkehus, kjedehus og terrassehus til og med tre etasjer, jamfør NS 3457-3:2013». Fortetting vil skje automatisk i sentrum, grunna høge tomteprisar. Ein må ha flest mogleg bustader på ei tomt, for at byggjeprosjekta skal bli lønnsame for utbyggjar og attraktive for kjøpar. I sentrumsområde er det òg gjerne slik at det ikkje berre er snakk om å utnytte ledige tomter, men at ein kjøper opp eldre bygg for å rive og byggje nytt. Kjøper ein eit eldre hus i sentrum for å rive og byggje nytt, vil det gjerne vere for lite areal til å byggje 6-mannsbustad og sikre tilstrekkeleg med parkering, men ein 4-mannsbustad vil kunne gå. Me oppfattar at målet med føresegna er høgre utnyttingsgrad av tomter og fortetting i sentrum. Det vil då vere klokt å opne opp for til dømes 4-mannsbustader. Me føreslår difor at ein nyttar terminologien i plan- og bygningslova, og endrar føresegna til følgjande: 3. Innanfor sentrumskjernen for kommunesenteret på Svortland skal det ikkje byggjast eine- eller tomannsbustader, såframt anna ikkje er godkjent i eigen reguleringsplan. Alternativt kan det vere ein idé å gjere ein sjekk med omkringliggjande kommunar (til dømes Stord, Sveio, Haugesund), og sjå korleis dei har løyst tilsvarande i sine føresegner. |
2.4.1 Senterstruktur og lokalisering av handel og besøksintensive verksemder (pbl. § 11-9 nr. 5) 4. Bygging av konsentrert småhusbygg og bustadblokker skal gjerast i eller i tilknyting til kommunesenteret og lokalsenter. Innspel frå næringsrådet: Me ber om at begrepet «konsentrert småhusbygg» vert definert annleis, gjerne same definisjon som i TEK17. Aller helst bør punktet fjernast. Årsaka til det, er at kommunen og andre interessentar ofte snakkar om at det bør byggjast fleire og rimelegare bustader i kommunen vår. Då bør det vere lov å byggje til dømes ein firmannsbustad på Gåsland, Totland, Våge mv. Rimelegare bustader er berre mogleg å få til gjennom fleire einingar på same tomt, samt at tomta er rimeleg. Då må ein litt ut i periferien, og ikkje inn i sentrum. |
2.4.1 Senterstruktur og lokalisering av handel og besøksintensive verksemder (pbl. § 11-9 nr. 5) 6. Ved regulering i kommunesenteret eller lokalsentra som ligg til sjø eller vassdrag skal det sikrast allmenn tilgang til strandsona i form av strandpromenade, offentleg tilgjengeleg kai og/eller parkar/friområde, og fellesanlegg. Innspel frå næringsrådet: Det vil vere attraktivt med bustadfelt som ligg til sjø eller vassdrag, og ikkje minst vil det vere attraktivt med bustadfelt med allmenn tilgang til strandsona. Samstundes er det slik at det i nokre tilfelle vil vere store kostnader i å sikre allmenn tilgang til areal som ligg til sjø i form av strandpromenade, offentleg tilgjengeleg kai og/eller parkar/friområde, og fellesanlegg. Høge kostnader med å legge til rette for offentlege anlegg til sjø, vil gjerne vere samanfallande med større inngripen/nedbygging av naturen. For å ikkje legge hindringar for attraktive bustadfelt til sjø eller vassdrag, foreslår me følgjande omskriving av føresegna. 6. Ved regulering i kommunesenteret eller lokalsentra som ligg til sjø eller vassdrag bør det sikrast allmenn tilgang til strandsona i form av strandpromenade, offentleg tilgjengeleg kai og/eller parkar/friområde, og fellesanlegg, forutsett at det ikkje gjer for store inngripen i natur og/eller er økonomisk forsvarleg å gjennomføre. Det bør dessutan presiserast at der terrengforhold tilseier det, kan strandpromenade flyttast vekk frå sjø og vassdrag og leggjast til meir høveleg plassering som gjev minst mogleg avtrykk på naturen. |
2.4.3 Kvalitet, utforming og landskap (pbl. § 11-9 nr. 5, 6, 7, 8) 14. I naustområde og fritidsområde ved sjøen skal det planleggjast for etablering av fellesløysingar for småbåtanlegg. Innspel frå næringsrådet: Kommuneplanen stoppar i dag stort sett 3 meter frå kystkonturen, og då kan ein ikkje lage til eit småbåtanlegg som går 15+ meter ut i sjøen. Slike anlegg bør utviklast organisk der folk ønskjer å bu, ref. pkt. 2.4.1, heller enn nokre stader kommunen peikar ut i planen. Me ber difor om at kommunen tek inn i føresegnene eit punkt om at kommunen kan godkjenne fellesareal i sjø, for områder som vert utvikla undervegs i ein planperiode, og der det er naturleg å leggje opp til slike anlegg, men som går utanfor gjeldande kommuneplan. |
2.4.4 Uteopphaldsareal i bustadområde (pbl. § 11-9 nr.5) 1. Ved samla bygging av meir enn 4 nye bustadeiningar skal det setjast krav til opparbeiding av areal til privat og felles uteopphaldsareal i tråd med areal vist i tabell (sjå føresegner høyringsunderlaget). Innspel frå næringsrådet: Slik tabellen er no, ekskluderer dette moglegheita for å byggje til dømes to 4-mannsbustader. Me foreslår difor og stryke ordet «over» i rad to i tabellen. |
2.4.4 Uteopphaldsareal i bustadområde (pbl. § 11-9 nr.5) 2. I område utan eigna og sikra areal for leik og rekreasjon, skal det i nye reguleringsplanar, avsetjast og sikrast nødvendig areal til dette føremålet. Innspel frå næringsrådet: Dersom ein regulerer areal tilknytta eit eksisterande, eldre byggjefelt, kor det ikkje er lagt opp til areal for leik og rekreasjon, kan ein tolke føresegna som at ein må lage til areal for leik og rekreasjon for det samla området. I desse tilfella risikerer ein at ein ikkje får lønnsemd i utvidingar, då ein må lage til store område. Me foreslår difor følgjande omskriving: I område utan eigna og sikra areal for leik og rekreasjon, skal det i nye reguleringsplanar, avsetjast og sikrast nødvendig areal til dette føremålet, dimensjonert til talet på nye bustader som skal førast opp. |
2.4.7 Parkering (pbl. §11-9, nr. 5) Innspel frå næringsrådet: Grunna utilfredsstillande løysingar frå mobilitet til/frå jobb og kvardagslogistikk elles, fører det til at mange må køyre til/frå jobb. KPA-en bør difor ikkje leggje maks grense på parkeringsplassar til kontor. Burde derimot vere endra til 2 på parkering, mtp. kontorfellesskap til dømes. |
3.1.1 Bustadområde (pbl. § 11-10 nr. 1 og 2) 2. Det er krav om reguleringsplan for nye bustadføremål, med unntak i § 2.1.3. Forutan føringar i kapitel 2, felles føresegner, gjeld følgjande føringar for bygging utan reguleringsplan:
Innspel frå næringsrådet: Det vil vere i kommunen si interesse at det vert utvikla bustadprosjekt som blant anna førstegangsetablerarar har råd til. Tomteprisar i sentrum er ofte høge, og unge som ønskjer å flytte heim og kjøpe rimeleg bustad, vil gjerne bu i mindre einingar kort veg frå sentrum, heller enn å kjøpe dyrare leilegheiter i sentrum. Det bør òg vere mogleg å byggje 4- og 6-mannsbustader (ikkje berre 2-mannsbustader), og det bør vere rom for å byggje fleirdelte bustader utanfor kommune- og lokalsenter. Me foreslår difor å ta vekk heile pkt. 2. |
3.1.2 Fritidsbustader (pbl. § 11-10 nr. 1 og 2) 2. Det kan tillatast maksimalt 1 fritidseining per tomt. Samla bruksareal for kvar fritidseining skal ikkje overstige 110 m2 BRA. Det kan byggjast eitt frittståande uthus på inntil 20m2 BRA per tomt. 7. Det kan byggjast ei frittståande grillhytte/bod/uthus på inntil 15m2 BRA per tomt. Dette skal liggja i bakkant av fritidsbustaden. Maksimal mønehøgd er 4 meter og gesims 3 meter over planert terreng. Innspel frå næringsrådet: For pkt. to bør det presiserast at areal for uthus mv. er i tillegg til arealet for fritidsbustaden på eigedomen. 2. Det kan tillatast maksimalt 1 fritidseining per tomt. Samla bruksareal for kvar fritidseining skal ikkje overstige 110 m2 BRA. Det kan i tillegg byggjast eitt frittståande uthus på inntil 20m2 BRA per tomt. Foreslår difor følgjande omskriving av pkt. sju: 7. Det kan i tillegg byggjast ei frittståande grillhytte/bod/uthus på inntil 15m2 BRA per tomt. Denne bør liggje i bakkant av fritidsbustaden, eller anna eigna plassering i høve tomt og naboar. Ei bod kan plasserast under balkong såframt storleiken ikkje overstig kravet om 15m2 BRA. Maksimal mønehøgd er 4 meter og gesims 3 meter over planert terreng. |
3.1.5 Næringsbygningar (pbl. § 11-10 nr. 1 og 2) 3. Næringsareal nærare sjø enn 50 meter skal vera sjørelatert, eller tilknytt sjørelatert næringsverksemd. Innspel frå næringsrådet: For store flateplanerte områder som til dømes Serklau, Hovlandshagen, og Rubbestadneset er naturleg at må utnyttast til større sjøretta næringar. Men føresegna må ikkje avgrensast til at næringsareal nær sjø skal vera sjørelatert eller tilknytt sjørelatert næringsverksemd. Reiseliv til dømes er ei viktig næring for Bømlo, og det kan forventast at næringa vil auke i omfang i åra framover. Sunnhordland er sertifisert som ein berekraftig reiselivsregion, og Bømlo er sentral i Geopark Sunnhordland som nyleg fekk UNESCO-status. Bømlo består av fleire «avleggs» tettstadar tett på sjø, som til dømes Urangsvåg, Foldrøyhamn, Mælandsvåg, Alvsvåg, Lykling og Melingsvåg. Fleire av desse har ein grunnleggjande infrastruktur som veg, kaier osb. som mogleggjer enkel ombruk. Fellesnemnar er at dei er lite eigna for større industriverksemder som har sjøen som næringsveg. Gjenbruk er kanskje først mogleg dersom ein får utvide arealet noko, jf. dagens krav til parkering, universell utforming, varelevering med meir. Det er vesentleg at det opnast for gjenbruk av desse områda, då gjenbruk kan gje områdeløft og næring kan gi tilskot til fellesskapet og opne opp areal som i dag er lite i bruk eller opplevast privat. I tillegg vil utvikling og transformasjon av desse historiske stadane vere både framtidsretta og berekraftig. Næring på desse nemnde områda, i nærleik til sjø, kan vere reiseliv og destinasjonsutvikling, småindustri som kan blomstre i etablerte vågar, kontorklynger med meir. Heile identiteten til Bømlo er jo bygga kring sjøen, så viktig at dette vert teke med i planar framover òg. Me foreslår difor følgjande formulering av punktet: 3. Næringsareal nærare sjø enn 50 meter skal vera sjørelatert, eller tilknytt sjørelatert næringsverksemd, destinasjonsutvikling, reiseliv, kontorfellesskap, småindustri eller andre næringstilbod som aukar attraktiviteten til Bømlo som stad å bu. Det er òg viktig at KPA-en tek høgd for å legge til rette for mindre utviding av arealet desse stadane, slik at gode initiativ lettast mogleg kan gå i gang med å legge til rette for dagens krav til parkering, universell utforming, varelevering med meir. |
3.1.9 Naustområde (pbl. § 11-10 nr. 1 og 2) 6. Maksimal mønehøgd for naust er 5 meter målt frå ferdig golv. Taket skal utformast som saltak, med takvinkel mellom 40-45 grader. Takutstikk skal vera knappe. Taktekking skal vera som for tradisjonelle naust. Vindauge skal vera ståande (høge). Samla tillate vindaugsflate er 3 m2 og eitt vindauge kan ikkje vera større enn 1 m2. For eksisterande større naust over 40 m2 BRA er det tillat med lysflate inntil 3 % av bygget sin totale veggflate. Våtrom skal maksimalt utgjera 4 m2 BRA i naustet. Innspel frå næringsrådet: Høgdeavgrensing på naust bør ikkje låsast til 5 m. Her bør det vera rom for høgre naust, så framt ein held seg innafor maks bruksareal på 40 m2 BRA. Klarar ein å fordele 40 m2 BRA på to plan, vil til dømes naturinngripen bli mindre. I tillegg bør det tydeleggjerast kva som meinast med 5 m. Foreslår difor at ein endrar til følgjande: «Maksimal mønehøgd for naust er i utgangspunktet 5 meter målt frå ferdig golv til topp sperrespiss. Det vert opna opp for høgre mønehøgd, såframt ein held seg innanfor total BRA på 40 m2 fordelt på to etasjar, derav maksimalt 25 m2 i 1. etasje.». Dette vil gje rom for å byggje høgre naust, og samstundes gje mindre naturinngripen. Det vil i tillegg gje ein større variasjon som vil vera meir tiltalande utsjånadsmessig. |
3.1.9 Naustområde (pbl. § 11-10 nr. 1 og 2) Retningslinjer b) Nye enkeltnaust bør oppførast som frittståande einingar. Andre utformingar av naust kan vurderast gjennom reguleringsplan dersom naustet er fellesnaust, eller det ligg føre gode arkitektoniske og landskapsmessige løysingar. Innspel frå næringsrådet: Her er det fint om det blir tydeleggjort når andre utformingar av naust kan vurderast. Slik setninga står no, er det uvisst om andre utformingar berre kan vurderast når det er reguleringsplan til stades, eller om krav om reguleringsplan berre gjeld om naustet er felles naust. Slik me forstår setninga, og som me meiner er mest hensiktsmessig formulering i høve erfaringar byggjenæringa har gjort seg, er som følgjer: Nye enkeltnaust bør oppførast som frittståande einingar. Andre utformingar av naust kan vurderast gjennom
|
3.4.2.1 Felles føresegner (pbl. jf. § 11-11 nr. 1 og 2 Retningsline a) Det er bygging av bustad/fritidsbustad som tel ned talet nye einingar i plankartet – ikkje frådeling av tomt. Nye tomter kan opprettast dersom det samstundes vert byggemeldt bueining. Tidlegare oppretta tomter kan byggjast på om dei er eigna til utbygging. I digital versjon av plankartet i kommunekart.com vert kvotene oppdatert kontinuerleg og synt slik: tal attverande kvote (tal opphavleg kvote). Innspel frå næringsrådet: Bygging i LNF-spreidd/eksisterande bustadområde er ein viktig del av inntektsgrunnlaget til byggjenæringa på Bømlo, og det er mange som flyttar heim fordi dei kan byggje i til dømes LNF-spreidd på heimegarden, nabolaget der dei vaks opp mv. Sist rullering og godkjenning av KPA var i 2013, slik at mange har blitt stoppa frå å byggje i LNF-spreidd/eksisterande bustadområde i dei seinare år. Me foreslår difor at det blir lagt inn ei formulering, om at dersom KPA-en ikkje er ferdig rullert kvart 4. år, så opnar ein opp for å starte teljing i område definert som LNF-spreidd eksisterande bustadområde på ny. |
3.4.2.2 LNF-spreidd bustad, fritid og næring (pbl. jf. § 11-11 nr. 1 og 2) 1. Utnyttingsgrad for bustadtomt skal ikkje overstiga 25 %-BYA. Uavhengig av utnyttingsgrad skal storleik på bustadar ikkje overstige 350 m2 BRA. Innspel frå næringsrådet: Eit krav om maksimalt 25 % utnytting fører berre med seg at tomtane vert unødig store ved frådeling. Derfor bør utnyttingsgraden i LNF-spreidd bustad vera 35%. 1. Utnyttingsgrad for bustadtomt skal ikkje overstiga 35 %-BYA. Uavhengig av utnyttingsgrad skal storleik på bustadar ikkje overstige 350 m2 BRA. |
Me takkar for moglegheita til å spele inn vårt høyringssvar, og ser fram til endeleg vedteken plan.