Næringsrådet leverte i går sitt høyringssvar til straumprisutvalet sin rapport. Me ber om løysingar som raskt gjev prisutjamning mellom prisområde, at det blir utforma ein politkk for raskare utbygging av kraftnettet mellom prisområda i Noreg, og at ein større del av flaskehalsinntektene vert brukt til å redusere nettleiga i det prisområde kor flaskehalsinntekta har oppstått. I tillegg peikar me på behovet for verkemiddel og incentiv for å få fortgang i arbeid med energieffektivisering i næringslivet. Under kan de lese heile svaret.

Bømlo Næringsråd viser til Strømprisutvalget sin rapport «Balansekunst». Rapporten er ein grundig og god gjennomgang av kraftsystemet og moglege tiltak for å bidra til stabile, føreseielege og konkurransedyktige prisar. Bømlo Næringsråd ønskjer her å gje nokre innspel til rapporten på område som påverkar næringslivet i vår region.

Bømlo høyrer til same prisområde som alle utanlandskablar, noko som gjer at næringslivet ofte har vesentleg høgre straumpris enn næringsliv i andre prisområde. Straumkostnaden går rett på botnlinja, og me ser at våre bedrifter mister innovasjonskraft og tapar terreng opp mot konkurrentar i andre prisområde.

I praksis utgjer dette ei stor konkurransevriding mellom næringsaktørar innanlands, og me ber om at 1) det raskt vert etablert løysingar for prisutjamning mellom prisområde, 2) det snarleg vert utforma ein politikk for raskare utbygging av kraftnettet mellom prisområda i Norge, slik at den innanlandske konkurransevridinga vert motverka og 3) at ein større del av flaskehalsinntektene vert brukt til å redusere nettleiga i det prisområde kor flaskehalsinntekta har oppstått. «Midlertidig forskrift for bruk av flaskehalsinntekter» må vidareførast fram til ein har klart å balansere straumprisane mellom prisområde innanlands.

Når det gjeld energieffektivisering, er dette eit viktig arbeid for å redusere behovet for kraft på nettet. Lokalt ser me moglegheiter i alt frå gjenbruk av spillvarme, produksjon og lagring av kraft på industriområde med meir. For å lukkast med energieffektivisering, vil det vere behov for tett samarbeid og sterk koordinering mellom næringsaktørar som er lokalisert i nærleiken av kvarandre, både eksisterande og nye. Ei utfordring i dag, er at det ikkje er nokon til å ta denne kosten, og ny produksjon garanterer ikkje ny tilknyting til nettet. Me ber difor om at det blir etablert målretta verkemiddel som set næringslivet i stand til å energieffektivisere på ein effektiv måte, og gjer dei incentiv, for å legge til rette for vekst i både nytt og etablert næringsliv. Det bør òg på plass nye eller betre ENOVA-ordningar for støtte til batteri, og ombygging til vassbåren varme i eksisterande bygg.

Bømlo Næringsråd ber om at innspela våre vert teke omsyn til i arbeidet vidare, slik at det vert føreseielege og rettvise rammevilkår for næringslivet når det kjem til straumprisar, og god tilrettelegging for energieffektive løysingar framover.